Mae nifer o’r heriau rydym wedi’u nodi, yn enwedig y rheini sy’n cyfrannu at y nod ar gyfer cydnerthedd, yn gyffredin i ardaloedd heblaw Conwy a Sir Ddinbych a bydd y gallu i gwrdd â’r heriau hyn yn allweddol wrth gyflawni ein cyfrifoldebau byd-eang. Rhai o’r prif enghreifftiau yw lleihau allyriadau carbon, lleihau gwastraff ac ailgylchu.
Mae gennym gyfrifoldeb hefyd i ddiogelu a hyrwyddo ein treftadaeth ddiwylliannol a naturiol unigryw.
Yng Nghonwy a Sir Ddinbych ceir safleoedd hanesyddol a diwylliannol sydd o bwys rhyngwladol cydnabyddedig ac mae’r ddwy ardal yn cynnal digwyddiadau rhyngwladol ac yn gartref i gymunedau lle mae’r Gymraeg yn rhan hanfodol o fywyd cymunedol, masnach ac addysg.
Ceir tirweddau yn y ddwy ardal sy’n eithriadol o hardd ac o bwysigrwydd gwyddonol sydd wedi’u cydnabod yn rhyngwladol. Maent yn cynnwys cynefinoedd i anifeiliaid a phlanhigion unigryw a nythfeydd pwysig iawn i adar prin ac ymfudol.
Fodd bynnag, yn ogystal â bod yn bwysig o safbwynt diwylliannol ac amgylcheddol ar lefel fyd-eang, mae’r dirwedd, bywyd gwyllt, diwylliant ac iaith yn ffactorau allweddol yn lles y poblogaethau lleol ac ym mhoblogrwydd a phwysigrwydd economaidd y sectorau twristiaeth yn ardaloedd y ddau awdurdod lleol.
Bydd newidiadau mewn economïau cenedlaethol a rhyngwladol yn gallu cael effaith sylfaenol ar ardaloedd y ddau awdurdod lleol a’u preswylwyr. Ymchwilir yn fwy trwyadl i hyn pan fydd gwaith ymchwil Llywodraeth Cymru ar Dueddiadau’r Dyfodol ar gael.
